het-arubahuis

Persberichten

Na Cas di Aruba a tuma lugar un recepcion pa gradici tur esnan cu a contribui na un exitoso Arubadag 2010

Den Haag – Na Cas di Aruba a tuma lugar – un dia despues di e gran celebracion di Arubadag na Utrecht – un recepcion pa gradici tur esnan cu a contribui na un exitoso Arubadag 2010.

Minister Plenipotenciario sr. Edwin Abath tabata tin palabra di elogio pa e miembronan di Hobennan Activo na Hulanda (HAH) cu nan trabao di e ultimo lunanan pa organisa Arubadag 2010. Tur e personal di Gabinete cu den nan propio forma, banda di nan trabao di tur dia, tambe a duna nan aporte na e evento aki. Sr. Abath a bisa cu nos por ta orguyoso ora cu nos mira con grandi e evento di Arubadag a bira; cu e publico presente a bin pa festeha nos Dia Nacional na un manera civico y ordena. E mandatario tambe a gradici tur e artistanan cu a contribui cu nan talento na e programa di e dia ey.

Sr. Abath a papia di e lema cu el’a scohe pa e dia aki cu ta “Tur Cos pa Aruba” y esaki e por a presencia den e hobennan y personal di Cas di Aruba cu a contribui incansablemente y cu pasion na organisacion di Arubadag 2010.

Directora di Cas di Aruba sra. Mr. Desirée Croes, cu alabez ta presidente di e Comicion Arubadagviering 2010, tambe a gradici tur hende cu a yuda na haci e celebracion bira un exito rotundo. Sra. Croes a bisa cu un di e prome labornan na momento cu ela cuminsa cu su funcion na Cas di Aruba ta pa cuminsa cu e organisacion di Arubadag 2010. Ela bisa cu e por bira atras ariba un comicion organisador hopi activo y hopi entusiasma pa cu organisacion di e evento.

Prome Minister sr. mr. Mike Eman cu ta na Hulanda pa un bishita di trabao – tambe a gradici e comicion responsabel pa e trabao excelente realisa diadomingo ultimo den Veemarkthallen na Utrecht. Esaki tabata su prome Arubadag como Prome Minister di Aruba. Sr. Eman a mustra ariba e hecho cu Aruba por ta chiquito den tamaño, pero cu nos a demostra cu nos por haci cosnan grandi. Cu nos por ta orguyoso di ta Arubiano, asina Prome Minister Eman a bisa.

Tanto Ruben Garcia cu tabata tin na su encargo como maestro di ceremonia pa e parti musical y Jossy Brokke a papia di nan experencia durante e celebracion di Arubadag y a gradici e comocion organisador pa a duna nan e honor y previlegio pa ta parti di e celebracion aki na Hulanda.

E cantante Sharon Rose a haci uso di e ocacion pa presenta na Minister Plenipotenciario un cd di su cantica ganador di e Festival un Canto na nos Himno y Bandera 2010 cu ta hiba e titulo “Mil y un Recuerdo”.

E recepcion a sigi den un abiente ameno cu canto di e artistanan presente, manera Trio Huasteca, Jeffrey Kelly y cu actuacion di Vale Croes cu su chistenan.

 

022Thank_you_party_0001  022Thank_you_party_0011  022Thank_you_party_0014  022Thank_you_party_0016