het-arubahuis

Persberichten

Bishita di artista Arubano Joshua Newton

Den Haag – Cas di Aruba a ricibi bishita di e artista Arubano Joshua Newton. Minister Plenipotenciario sr. Edwin Abath, directora di Cas di Aruba sra. Mr. Desiree Croes, director di ATA Europa sr. Humphrey Vrolijk, director di Buro Six sr. Six van Leeuwen, personal di Cas di Aruba y ATA Europa a saluda Joshua den Sala Padu. Joshua a conquista hopi fama bou di e publico Hulandes cu su participacion den e popular programa di television di SBS 6 Popstars. El’a yega te na e finale di Popstars cu a keda gana pa e cantante Wesley.

Minister Plenipotenciario sr. Edwin Abath a cuminsa na bisa cu na principio e no tabata sa kende ta Joshua y no tabata conoce e programa Popstars, pero despues di a tende cu tin un hoben Arubiano ta den e programa ela cuminsa mira e show tur siman.

Sr. Abath a bisa cu Joshua ta un ehempel pa hopi hoben Arubiano tanto na Hulanda como na Aruba.  E mandatario a bisa cu e por a experencia cu Joshua tin talento y perseverancia y cu sigur nos lo bai tende y mira hopi dje den futuro.

Como muestra di aprecio Minister Plenipotenciario a sorpresa Joshua cu un estadia na Aruba pa cortesia di “Does y Cadushi Tours” y a desea Joshua tur clase di exito den futuro.

Joshua na su turno a gradici e mandatario y personal di Cas di Aruba pa e bunita recepcion y a bisa cu e ta contento di comparti e exito aki bou di su mesun hendenan.

 

013Bezoek_Joshua2  013Bezoek_Joshua3