het-arubahuis

Persberichten

Ceremonia oficial na ocacion cu KLM a re anuda su vuelonan pa Aruba

Den Haag – Na aereopuerto Schiphol a tuma lugar e ceremonia oficial na ocacion cu KLM a re anuda awe su vuelonan pa Aruba. Den e VIP room tabata presente minister-president di Aruba sr. mr. Mike Eman, minister di transporte di Hulanda sr. ir. Camiel Eurlings, minister pa Asuntonan Economico, Social y Cultura sra. Michelle Hooyboer-Winklaar, minister plenipotenciario sr. Edwin Abath, presidente di KLM sr. Peter Hartman, directora di Cas di Aruba sra. mr. Desiree Croes, director di ATA Europa sr. Humphrey Vrolijk, sr. Roy Hart, representantenan di KLM, Schipholgroup, touroperators y prensa.

Minister di Transporte di Hulanda sr. Camiel Eurlings a cumisa na bisa cu e ta corda e momento na maart di aña pasa cu e ultimo avion di KLM a sali pa Aruba y por a ripara con pisa e decision aki a cai na Aruba. E mandatario a expresa cu Aruba a experencia esaki como algo hopi emocional y doloroso, debi na cu e conocido avion blauw no ta baha mas na Aruba. Sinembargo, e mandatario a sigui bisa, e mainta aki tin un nificacion hopi mas simbolico; e ta confirma cu nos ta un Reino. Sr. Eurlings tabatin palabra di aprecio pa Prome Minister mr. Mike Eman y su team cu na tur momento a acentua cu nos ta partner, nos ta igual, nos ta amigo den Reino y cu nos por traha hunto. ‘Unda cu nos por yuda otro. Esaki ta un signal cu a cai den masha bon tera cerca mi Gobierno y cerca tur otro hendenan cu mi a papia cune. Esaki ta un alivio na e manera positivo cu abo como premier di Aruba ta para encuanto cooperacion den Reino. Bo mes a bin lobby cu KLM y a sabi di convence KLM cu bo actitud positivo y confiansa. Esaki a traha positivo cu awe caba KLM a reanuda su vuelonan pa Aruba,’ asina Minister Eurlings a bisa.

Terminando e mandatario a bisa cu tin formanan nobo pa coopera y cu lo haci cu Aruba y Hulanda lo yega mas cerca di otro y hunto lo para fuerte pa loke futuro ta brinda.

Prome Minister mr. Mike Eman a papia di un momento special. E vuelonan di KLM ta representa un total di 19 mil na asiento adicional pa Aruba. Pero banda di e cifra aki esaki ta nifica mas un base di sosten pa Reino. ‘E ta un signal na partnernan cu nos por logra hopi mas cos hunto cu nos ta kere. Nos por mira cu na momento cu nos aserca Reino na un manera constructivo y positivo, tin hopi porta cu ta habri pa nos. E cooperacion lo wordo fortaleci. Nos ta kere cu mester por papia di duna nos den caso aki un fair chance, sigur si di nos banda nos tin un actitud positivo y un vision claro pa loke nos ta desea na logra hunto y con pa logra esaki,’ segun Prome Minister sr. Mike Eman. E mandatario a gradici minister Camiel Eurlings pa su empeño constante.

Presidente di KLM sr. Peter Hartman a bisa di ta orguyoso cu KLM ta dispuesto pa cuminsa cu vuelonan pa Aruba. Tambe sr. Hartman a bisa cu Prome Minister Eman a convence KLM cu bon argumento pakico nan mester bula pa Aruba. Hartman: ‘E no ta keda na argumento so, sinembargo ta e hechonan a mustra cu Aruba ta tene su mes na su palabracionnan.’

E director di KLM a bisa cu KLM desde 1935 a cuminsa bula ariba e islanan di Antia y ela bisa cu e ta spera cu KLM lo keda pa un periodo largo; KLM ta trahando ariba mas renobacion di nan flota y posibelmente por desaroyoa - banda di pasahero – tambe posibilidad di transportacion di carga.

Na final Prome Minister Mike Eman a haci entrega di un pen di Aruba na minister Eurlings y sr. Hartman como recuerdo di e ceremonia aki.

E delegacion a bandona e VIP room di Schiphol y na e gate tabata tin musica di banda Rayo di Rafi Camacho y Joopie Nicolaas pa deleita a invitadonan y e pasaheronan ariba vuelo KL 783 pa Aruba y Corsow.

 

011A_Schiphol__0005   011A_Schiphol__0002