Den Haag – Na Cas di Aruba a tuma lugar awe diabierna 22 di Januari 2010, na vispera di Dia di Betico, un ceremonia pa recorda e fecha di natalicio di Sr. Gilberto Françoise “Betico” Croes, politico y estadista Arubiano.

 

Minister Plenipotenciario sr. Edwin Abath a ilustra den su discurso na e ocacion aki e amor grandi cu Betico tabata tin pa su pueblo y su pais. Pa cita un dicho hopi conoci: ‘Celebra mi bida y no enfoca riba mi morto‘, asina sr. Abath a bisa. Betico su lucha a conduci cu Aruba a bira un pais cu awe ta para ariba su propio pia.

 

Ya caba den añanan trinta di e siglo pasa e Arubiano a duna di conoce cu Aruba mester bira soberano den Reino Hulandes. Sr. Betico Croes a traha ariba e fundeshi aki pa logra libertad di nos pais. Cu su logro y esfuerso Aruba a bira pais autonomo den Reino prome di Januari 1986. Awe, nos, e generacion nobo di  politiconan Arubiano, kier establece cu nos mester fortalece e lazonan dentro di Reino Hulandes. Sinembargo, aunke cu a scohe formalmente na 1996 pa keda den Reino, nos ta di pensamento cu Reino no ta un fase final, sino un bon vehiculo den e buskeda di oportunidadnan nobo. Arubianonan semper a busca pa amplia nan horizonte, nan ta trahadornan duro y nada pa nos ta imposibel,’ asina sr. Abath a bisa.

 

Loke semper a resalta cerca nos hendenan ta cu Arubianonan ta orguyoso. ‘E siman aki mi tabata na un encuentro na Den Haag y e pregunta a keda lansa kico ta haci e diferencia entre un Arubiano y un Antiano. Un mucha muher Arubiano di origen Dominicano, lanta na Aruba, a bisa cu e Arubiano ta un ser orguyoso. Esaki un biaha mas a demostra cu no ta importante bo origen, sino e hecho cu bo a lanta na Aruba y a biba segun su principionan y a adopta su custumbernan. Esaki ta e herencia di sr. Betico Croes. Honor y Gloria awe na su nomber cu nos tin un Cas di Aruba na Hulanda; nos tin nos himno y bandera, nos escudo y moneda. Pa ami como e di shete Minister Plenipotenciario na Hulanda, ta  yenami e momento aki cu satisfaction.

 

Directora di Cas di Aruba sra. mr. Dèsirée Croes a remarca cu dia 25 di Januari si sr. Betico Croes tabata na bida elo a cumpli 72 aña. ‘Mi ta corda cu 30 aña pasa – como un mucha di 12 aña – mi a cera conoci cu sr. Betico Croes. Loque semper a impresionami ta charisma, su amabilidad cu a simbolisa su bida. Su personalidad a yena nos cu orguyo cu e tabata tin e curashi pa sigi cu e lucha pa libertad di nos pueblo,’segun palabra di sra. mr. Dèsirée Croes.

 

Despues di esaki Minister Plenipotenciario sr. Edwin Abath y directora di Cas di Aruba sra. mr. Dèsirée Croes a pone flor na e busto di Betico Croes na Cas di Aruba.

 

E ceremonia a caba cu canto di nos himno nacional ‘Aruba Dushi Tera’.