Delegacion di Hobennan Activo a bishita Cas di Aruba

Den Haag – Un delegacion di Hobennan Activo na Hulanda (HAH) a haci un bishita di cortesia cerca Minister Plenipotenciario sr. Edwin Abath y directora di Cas di Aruba sra. mr. Désirée Croes.

Durante di e encuentro e representantenan di HAH a introduci nan mes y a papia ariba e motibo pa a lanta HAH. A papia ariba e mission y vision di HAH cu ta pa drecha e relacion cu Arubianonan na Hulanda pa medio di lectura y evenementonan.

HAH ta boga pa un cooperacion cu Cas di Aruba unda por brinda sosten den organisacion di eventonan y lectura. Tambe e fundacion ta boga pa ta un oido pa e studiantenan Arubiano na Hulanda na un manera informal. Alabez HAH por ta un voz pa Cas di Aruba; un brug entre e studiante y Cas di Aruba.

E grupo cu HAH tin na bista ta studiante Arubiano, pero otro interesadonan tambe por forma parti di e organisacion.

Tanto sr. Abath como sra. Croes a expresa nan entusiasmo cu e initiativa aki di un grupo di hoben cu kier ta activo bou di e comunidad Arubiano y principalmente e comunidad di estudiantenan Arubiano. E mandatario a desea HAH tur clase di exito cu nan actividadnan y a bisa cu HAH por conta cu sosten di Cas di Aruba pa realisa nan eventonan. Sra Croes a aporta na HAH cu un donacion personal.

E directiva di HAH ta consisti di Siegfried Eman, presidente, Maurits Malmberg vice presidente & PR, America Laclé, secretaris y Pierre Simon tesorero.