Bishita di studiante Junaica Donata na Cas di Aruba

Den Haag – Na Cas di Aruba a tuma lugar un ceremonia chiquito pa studiante Junaica Donata na ocasion cu ela caba cu su estudio HBO Verpleegkunde na Hogeschool Zeeland. Directora di Cas di Aruba sra. mr. Dèsirée Croes a felicita Junaica cu su logro y a pidie pa scirbi den e buki “Logronan di nos studiantenan” como recuerdo di e dia aki. Despues sra. Croes a haci entrega di un regalito na Junaica.

Junaica a bin Hulanda na 2002 y a cuminsa cu su estudio na Hogeschool Zeeland na Vlissingen. Su tesis tabata un investigacion bou di 60 studiante cu a cuminsa cu e estudio di HBO Verpleegkunde. Pregunta central den su investigacion tabata e expectativanan di e studiantenan HBO V den nan prome aña pa loke ta e estudio HBO V y e profesion di enfermero.

Un di e conclusion cu e investigacion a saca afor ta cu hopi studiante ta escohe pa studia pa enfermero basa ariba loke nan ta mira den serienan di television of nan tin famia ta traha den enfermeria. Hopi di e studiantenan aki ta stop den nan prome aña na momento cu nan constata cu e estudio no ta loke nan a pensa. Un recomendacion cu Junaica a haci den su tesis ta pa duna bon informacion na comienso di e estudio. Di cuminsamento mester tin claridad kico e estudio ta encera, pa asina e studiante no cuminsa cu expectativa ironeo cu e estudio. E claridad aki ta principalmente nesesario pa studiantenan cu a caba HAVO.

Actualmente Junaica ta trahando den thuiszorg na Den Haag como “verzorgende” y mas depues elo bai traha como enfermera.

Na September 2010 Junaica lo cuminsa cu su estudio pa su Master den Zorgmanegement na Universidad Erasmus na Rotterdam.

Sra. Croes conhuntamente cu miembronan di e personal di Cas di Aruba a desea Junaica tur clase di exito cu su Master na Erasmus na Rotterdam.